Վաստակաշատ մանկավարժը. Էդուարդ Փաշինյան

Ամփոփում

Էդուարդ Ռուբենի Փաշինյանը մեր իրականության ակնառու երաժշտագետներից է, ում ներդրումը մեծ է ոչ միայն գիտության, այլև մանկավարժության ոլորտում: Իր անկոտրում, համառ տեսակի շնորհիվ նա կարողացել է հաղթահարել ճանապարհին հանդիպած բոլոր դժվարությունները, բժշկի մասնագիտությունից կտրուկ անցում կատարել դեպի երաժշտագիտություն, դառնալով հարմոնիայի և պոլիֆոնիայի մինչ օրս միակ հայալեզու դասագրքերի հեղինակ: Իր դասագրքերում Փաշինյանն առաջարկել է մի շարք հայալեզու տերմիններ, ներառել է հայ երաժշտարվեստին նվիրված բաժիններ, որոնք մեկնաբանվում են իր կողմից առաջարկված ունիվերսալ գերլադային համակարգի դիրքերից: Փաշինյան-երաժշտագետի գործունեությունը զուգակցվել է կեսդարյա մանկավարժական գործունեության հետ: Փայլուն մանկավարժն իր ուսանողներին կրթել է ոչ միայն որպես երաժիշտներ, այլև նպաստել է նրանց, որպես անհատի ձևավորմանը: Մանկավարժական գործունեության ընթացքում Փաշինյանը ստեղծել է նոր դասընթաց երաժշտագետների և կոմպոզիտորների համար: Նա իր նոր խոսքն է ասել նաև սոլֆեջոյի դասընթացի շրջանակում, մշակելով իր մեթոդը, ներկայացնելով աստիճանային երգեցողության իր համակարգը: Փաշինյանի գործունեության ուրույն մասն է կազմում նրա կոմպոզիտորական արվեստը: Երաժշտագիտական մտքի խիստ հետևողականությամբ գրված իր փոքրածավալ գործերից շատերը նա կիրառում էր հարմոնիայի դասընթացում, որպես վերլուծության նյութ: Էդուարդ Փաշինյանը, իրավամբ, մեծ ուսուցիչ էր: